Коронавирусга қарши иккинчи авлод вакцинасининг халқаро клиник синовларига старт берилди

Жорий йилнинг 7 ноябрь куни бир вақтнинг ўзида Ўзбекистон ва Хитойда видеоконференция шаклида Omikron-Delta штаммига (янги коронавирус вакцинасининг иккинчи авлоди) қарши янги рекомбинант оқсилли вакцинасининг халқаро клиник синовини бошлаш маросими бўлиб ўтди – деб, Ўзбекистон Республикаси Инновацион ривожланиш вазирилиги хабар бермоқда.

Инновацион ривожланиш вазири Иброҳим Абдураҳмонов, вазир ўринбосари Шахло Турдиқулова, Ўзбекистоннинг Хитойдаги элчиси Фарход Арзиев, Вирусология ИТИ директори Эркин Мусабаев, Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов, Ички ишлар вазирлиги тиббиёт бирлашмаси бошлиғи Шуҳрат Нишонов, академик Gao Fu, Хитой касалликларни назорат қилиш ва профилактика маркази директори Cao Jinghua, Халқаро альянс котибияти ижрочи директори «Бир макон, бир йўл» (ANSO) илмий ташкилотлари ва Anhui Zhifeilongcom Biopharmaceutical Co., Ltd ижрочи президенти Tao Lifeng xonim ҳамда бошқа мутасаддилар клиник синовга расман старт бериш маросимида иштирок этди.

Ўзбекистон янги коронавирус вакцинасининг иккинчи авлод вакцинаси ҳамкорликда яралиб, тадқиқотлар ва клиник синовлар ўтказилаётганидан мамнунмиз, – деди инновацион ривожланиш вазири Иброҳим Абдураҳмонов. – Ўзбекистон ва Хитой ўртасидаги иккинчи авлод вакциналари бўйича ҳамкорлик муваффақиятли якунланиб, Ўзбекистон ва барча мамлакатлар учун янги имкониятлар очишига ишонамиз. Вакцинамизнинг Ўзбекистонда синовларини бошлаш учун Этика қўмитасининг рухсати олинган ва бугун сизлар билан тадқиқотлар ва клиник синовларни бошлаш арафасида турибмиз. Яна бир бор шуни таъкидламоқчиманки, мана шундай илғор технологияларга асосланган тақдиқотларнинг Ўзбекистонда амалга оширилиши ва хавф-хатарларга тайёр туриши учун имконият яратиб бераётгани учун Ҳукуматимиз, давлатимиз раҳбари, шу билан биргаликда халқаро ташкилотлар, компаниялар, элчихоналарга ва олимларимизга ўз миннатдорчилигимизни билдирамиз. Келажакда янги авлод вакциналарни пайдо бўлиши нафақат илм-фандаги ҳамкорлик натижаси, балки келгусидаги барча ҳамкорликларга замин яратдиган, деб ўйлаймиз.

Академик Gao Fu Хитой ва Ўзбекистоннинг икки томонлама саъй-ҳаракатлари билан ZF2001 ёки ZF-UZ-VAC-2001 янги коронавирусга қарши вакцинанинг биринчи авлоди муваффақиятли ишлаб чиқилгани ва бутун дунё бўйлаб 300 миллиондан ортиқ доза қўлланилиб, глобал эпидемияга қарши курашга катта ҳисса қўшилганини алоҳида таъкидлади. Янги коронавирус вакцинасининг иккинчи авлоди Omicron-Delta икки валентли протеин субунит вакцинасидир. Вирус прототипига асосланган биринчи авлод вакцинаси билан солиштирганда, янги вакцина кенгроқ ва кучлироқ иммун реакциясини келтириб чиқаради, ҳозирда кенг тарқалган Омикрон субвариантларини қамраб олади ва Омикроннинг кўтарилиши даврида янги коронавирус пандемиясини назорат қилишга муҳим ҳисса қўшади.

«Бир макон – бир йўл» ташаббусининг муҳим бўлими сифатида ANSO иккинчи авлод вакцинасининг хориждаги клиник синовларини қўллаб-қувватлаш учун барча саъй-ҳаракатларни амалга оширади, – деди Хитой касалликларни назорат қилиш ва профилактика маркази директори Cao Jinghua. – Бу ҳамкорлик миллий имиджни янада мустаҳкамлайди, Хитой ва Ўзбекистон ўртасидаги дўстлик ришталари ва тиббиёт соҳасидаги ҳамкорликни ривожлантиришга хизмат қилади. Шу билан бирга, бу мамлакатнинг «Бир макон – бир йўл» ташаббуси доирасидаги ишини ҳам фаоллаштирди.

Дунёда ўз ҳукмронлигини сураётган коронавирус касаллиги авж олганида хитой-ўзбек вакцинаси бизга қўл келган эди, – деди Ички ишлар вазирлиги тиббиёт бирлашмаси бошлиғи, полковник Шуҳрат Нишонов. – ZF-UZ-VAC2001 вакцинасининг бизнинг таркибда қўлланиши, аввалига, янгилик бўлган эди. Шахсий таркибимизда касалликлар аниқланиши вакцина қўлланилганидан сўнг кескин камайганди. Шу сабабли ушбу вакцинага нисбатан ишончимиз ошганди. Ҳозирги кунга қадар шахсий таркибнинг деярли 100 минг нафар ходимига вакцинация қилинган. Ва у ҳозирга қадар касалликка нисбатан ўз самарасини кўрсатиб турибди.

Иккинчи авлод оқсил вакцинасининг антигенлари янги коронавируснинг Дельта ва Омикрон мутация штаммлари учун мўлжалланган бўлиб, улар ҳозирда кенг тарқалган янги коронавирус Омикрон мутация штаммларидан яхшироқ ҳимоя қилиши кутилмоқда. Омикрон штаммининг янги мутацияси бутун дунёда давом этаётган бир пайтда, COVID-19 пандемиясига қарши Хитой ва Ўзбекистон ҳукуматлари ўз ҳиссасини қўшган ҳолда самарали ва узоқ муддатли ҳимоя вакцинасини яратишга умид қилмоқда.

Самарқандда ўтказилган Шанхай ҳамкорлик ташкилотининг саммитида икки давлат раҳбарларидан жуда ҳам катта қўллаб-қувватлаш ва келажакда бу ишларни янада ривожлантириш юзасидан топшириқлар олганмиз, – деди И.Абдураҳмонов. – Икки давлат раҳбарлари бизнинг ҳамкорлигимизга юқори баҳо беришди. Бу биз учун катта масъулиятдир. Шу билан бирга ҳамкорликни кенгайтириш вазифасини олдимизга қўйди. Бизда жуда катта жамоа шаклланган ва бу лойиҳа муваффаққиятли ўтишига ишонамиз. Бунга барча имкониятларимиз ва тажрибамиз ҳам етади. Энг муҳими, бизнинг ҳамкорларимиз ҳамда икки давлатнинг сиёсий иродаси бизга куч бағишлайди. Барча тадқиқотчиларни янги авлод вакцинаси билан табриклаб, муваффақиятлар тилайман.

Credits: telegram @mininnovation and https://t.me/nazokat_abdukunduzova
https://mininnovation.uz/oz/news/post-994