Talabalar oʼqishini koʼchirish yoki qayta tiklash

Talabalar oʼqishini koʼchirish yoki qayta tiklash:

oliy taʼlim muassasalari;
tizimida oliy taʼlim muassasalari boʼlgan vazirliklar va idoralar;
Oʼzbekiston Respublikasi taʼlim muassasalariga qabul qilish boʼyicha Davlat komissiyasi (keyingi oʼrinlarda Davlat komissiyasi deb ataladi) qarorlari asosida amalga oshiriladi.
Bir oliy taʼlim muassasasi doirasida oliy taʼlimning mos va turdosh yoʼnalishlari hamda mos mutaxassisliklari boʼyicha talabalar oʼqishini koʼchirish va qayta tiklash shu oliy taʼlim muassasasi rektorining buyrugʼi asosida amalga oshiriladi.
Quyidagi hollarda talabalar oʼqishini koʼchirish va qayta tiklash talabani qabul qilayotgan oliy taʼlim muassasasi boʼysunadigan vazirlik (idora) qarori asosida amalga oshiriladi:
oliy taʼlimning mos va turdosh yoʼnalishlari hamda mos mutaxassisliklari boʼyicha bir vazirlik (idora) doirasida boshqa oliy taʼlim muassasasiga;
oliy taʼlimning mos va turdosh yoʼnalishlari hamda mos mutaxassisliklari boʼyicha turli vazirlik (idora) doirasida bir oliy taʼlim muassasasidan boshqa oliy taʼlim muassasasiga.
Quyidagi hollarda talabalar oʼqishini koʼchirish va qayta tiklash Davlat komissiyasi qarori bilan amalga oshiriladi:
xorijiy davlatlarning akkreditatsiyaga ega boʼlgan oliy taʼlim muassasalaridan Oʼzbekiston Respublikasi oliy taʼlim muassasalariga;
bir oliy taʼlim muassasasi doirasida yoki bir vazirlik yoki idora yoxud turli vazirliklar va idoralar tizimidagi oliy taʼlim muassasalariga oliy taʼlimning turdosh boʼlmagan taʼlim yoʼnalishlariga va istisno tariqasida mos boʼlmagan mutaxassisliklariga.

Oliy taʼlim muassasalari talabalari oʼqishini koʼchirish

Oliy taʼlim muassasalari talabalarining oʼqishini koʼchirish (keyingi oʼrinlarda Talabalar oʼqishini koʼchirish deb ataladi) boʼyicha arizalarni topshirish va koʼrib chiqish quyidagicha amalga oshiriladi:
oʼqishini koʼchirish boʼyicha arizalarni taqdim etish — har yili 15 iyuldan 5 avgustga qadar amalga oshiriladi;
arizalarni oliy taʼlim muassasasi, tegishli vazirlik (idora) yoki Davlat komissiyasi tomonidan koʼrib chiqib, qaror qabul qilish — har yili 5 avgustdan 30 avgustga qadar amalga oshiriladi.
Talabalar oʼqishini koʼchirish uzrli sabablarga koʼra (respublikaning bir hududidan ikkinchi hududiga doimiy yashash uchun yoki turmushga chiqish munosabati bilan turmush oʼrtogʼi doimiy yashaydigan (pasport boʼyicha doimiy roʼyxatdan oʼtgan) hududga koʼchib oʼtganda, turmush oʼrtogʼi yoki ota-onasi harbiy xizmat oʼtash joyini oʼzgartirganda, yoxud ota-onasi (turmush oʼrtogʼi) xorijdagi davlat xizmatidan qaytganda) bahorgi semestrda oʼquv mashgʼulotlari boshlanishidan oldin ham amalga oshirilishi mumkin. Bunda:
oʼqishini koʼchirish boʼyicha ariza topshirish — har yili 20 dekabrdan keyingi yilning 20 yanvariga qadar;
oʼqishini koʼchirish boʼyicha arizani koʼrib chiqib, qaror qabul qilish — har yili 25 yanvardan 15 fevralga qadar amalga oshiriladi.
Oʼqishini koʼchirish istagini bildirgan fuqaro quyidagi hujjatlarni taqdim etadi:
koʼchirish (qayta tiklash)ni istagan taʼlim yoʼnalishi (mutaxassisligi), oʼquv tili va shakli koʼrsatilgan holdagi ariza (arizada oʼqigan oliy taʼlim muassasasi va taʼlim yoʼnalishi (mutaxassisligi), taʼlim shakli, maqsadli qabul boʼyicha oʼqishga kirmaganligi, koʼchirish (qayta tiklash) sabablari, koʼchirish (qayta tiklash) qoidalari bilan tanishganligi koʼrsatiladi);
talabaning reyting daftarchasi yoki belgilangan shakldagi akademik maʼlumotnoma nusxalari;
pasportning nusxasi.

Oliy taʼlim muassasalari talabalari oʼqishini qayta tiklash

Oliy taʼlim muassasalari talabalarining oʼqishini qayta tiklash (keyingi oʼrinlarda Talabalar oʼqishini qayta tiklash deb ataladi) boʼyicha arizalarni topshirish va koʼrib chiqish bir yilda ikki marta amalga oshiriladi:
oʼqishini kuzgi semestrga qayta tiklash boʼyicha ariza topshirish — har yili 15 iyuldan 5 avgustga qadar;
oʼqishini bahorgi semestrga qayta tiklash boʼyicha ariza topshirish — har yili 15 yanvardan 25 yanvarga qadar davom etadi.
Qayta tiklash boʼyicha arizalarni oliy taʼlim muassasasi, tasarrufida oliy taʼlim muassasalari boʼlgan vazirlik (idora) tomonidan koʼrib chiqib qaror qabul qilish:
kuzgi semestrga qayta tiklash uchun — har yili 5 avgustdan 30 avgustga qadar;
bahorgi semestrga qayta tiklash uchun — har yili 25 yanvardan 15 fevralga qadar amalga oshiriladi.
Oʼquv rejalardagi fanlari boʼyicha farqlar aniqlanganda talaba akademik qarzdor sifatida oʼqishga qabul qilinadi.
Joriy semestr davomida akademik qarzdorlik (farqlar) bartaraf etilgan muddatdan boshlab, oliy taʼlim muassasasi rektorining talabaga oʼrnatilgan tartibda stipendiya berish haqidagi buyrugʼi chiqariladi. Stipendiya miqdorini belgilashda fanlar boʼyicha farqlarni topshirish koʼrsatkichlari ham hisobga olinadi.