Prezident Shavkat Mirziyoev O‘zbekiston Milliy universitetida oliy ta’lim va ilmiy-tadqiqot muassasalari rahbarlari, akademiklar, olimlar, yosh tadqiqotchilar bilan uchrashdi. Uchrashuvda Toshkent temir yo‘l muhandislari instituti rektori Ma’rufjon Rasulov boshchiligidagi delegatsiya ishtirok etdi.
Uchrashuvda ilmiy-tadqiqot ishlarini tijoratlashtirish, kadrlar tayyorlash va ularni moddiy, ijtimoiy qo‘llab-quvvatlash masalalari haqida so‘z bordi.
Davlatimiz rahbari import o‘rnini bosadigan va ishlab chiqarishni mahalliylashtirishga qaratilgan ilmiy ishlanmalarni ko‘paytirish, sohadagi har bir tashkilot tizimida ilmiy mahsulotlarni bozorbop qiladigan marketing tizimini tashkil qilish zarurligini ta’kidladi. Ilmiy muassasalarni kelgusi yildan to‘g‘ridan-to‘g‘ri davlat byudjetidan moliyalashtirishga o‘tkazish taklifi olimlar tomonidan qizg‘in qo‘llab-quvvatlandi.
Izlanuvchan olimlarni rag‘batlantirish maqsadida ilmiy ishlanma yaratgan tadqiqotchiga doktorlik va uni amaliyotga tatbiq etgan izlanuvchiga tayanch doktorlik ilmiy darajasini beradigan binar (ikkitalik) himoya tizimini joriy etish, byudjet mablag‘lari hisobidan stajyor-tadqiqotchilar institutini hamda yurtimiz biologik xilma-xilligini o‘rganadigan dala-tajriba stantsiyalari tashkil etish bo‘yicha tavsiyalar berildi.
Keyingi yillarda ilm-fan va ta’lim sohasi xodimlari izchil rag‘batlantirilib kelinmoqda. Ilmiy xodimlarning oylik maoshlari o‘tgan yil 1 sentyabrdan o‘rtacha 25 foizga, joriy yil 1 yanvardan 20 foizga oshirilgan edi, 1 iyuldan esa yana 25 foizga ko‘tariladi.
Prezidentimiz bu amaliy choralarning mantiqiy davomi sifatida joriy yil 1 sentyabrdan barcha davlat tashkilotlarida ilmiy-pedagogik faoliyat bilan shug‘ullanayotgan, ta’lim va ilm-fan sohasida faoliyat olib borayotgan fan nomzodlarining oylik maoshlariga 30 foiz, fan doktorlari uchun esa 60 foiz ustama haqi belgilashni taklif qildi.
Shavkat Mirziyoev olim va pedagoglarning ijtimoiy sharoitlarini yaxshilash masalalariga ham alohida e’tibor qaratdi.
Xususan, Talabalar shaharchasi hududida professor-o‘qituvchilar, yosh tadqiqotchilar uchun 6 ta ko‘p qavatli uy va barcha sharoitlarga ega universal sport majmuasi qurish bo‘yicha topshiriq berdi. Shuningdek, shaharchada Yoshlar bog‘i, yozgi tomoshalar maydonchasi, «kitob-kafe»lar, Wi-Fi zonalarini tashkil etish va obodonlashtirish bo‘yicha vazifalar belgilandi.
– Iste’dodli yoshlarni izlab topish va ularni maqsadli tarbiyalash borasidagi ishlarni kuchaytirish kerak. Ilmni, tarbiyani to‘g‘ri qilsak, hamma sohalarni malakali mutaxassislar o‘zlari rivojlantiradi, – dedi Shavkat Mirziyoev.
Uchrashuv ishtirokchisi institut yoshlar bilan ishlash bo‘yicha prorektor Dilshod Baratovning fikriga ko‘ra, oliy ta’lim tizimini kompleks rivojlantirish borasidagi bugungi uchrashuv ta’lim va ilm-fan o‘rtasidagi ko‘prik vazifasini o‘taydi.
UzA.uz axboroti asosida tayyorlandi
